У Гомелі сваю новую кнігу прадставіла В. Лабачэўская
Студэнты, выкладчыкі спецыяльных навучальных устаноў, а таксама людзі, якія проста цікавяцца беларускай традыцыйнай культурай завіталі суботнім днём у філіял Веткаўскага музея ў Гомелі. Жыхары нашага горада першымі мелі магчымасць пазнаёміцца з новай кнігай Вольгі Лабачэўскай «Беларускія посцілкі і дываны: Антрапалогія і мастацтва традыцыйнай рэчы». На прэзентацыю ўнікальнага даследчага выдання прыехала аўтар – доктар мастацтвазнаўства, дацэнт, прафесар кафедры культуралогіі Беларускага дзяржаўнага ўніверсітэта культуры і мастацтваў.
У кнізе прадстаўлены асноўныя віды і мастацка-тэхналагічныя асаблівасці тканых посцілак і дываноў беларускай вёскі канца 19-га – пачатку 20-га стагоддзя. Даследуецца антрапалогія рэчаў, якія спадарожнічалі чалавеку на працягу яго жыцця: у побыце альбо абрадах. Народнае тэкстыльнае мастацтва прадстаўлена, як выдатная з“ява беларускай нацыянальнай культуры. Аўтар спачатку дапамагае чытачу зразумець рэч, потым прапануе спазнаць антрапалогію посцілак – гэта посцілкі ў аб“ектыве фатографа, у вясельным пасагу, у гарадскім асяроддзі і гэтак далей. Другі раздзел – гэта мастацтва посцілкі: радзюжкі, выцяганкі, перабіранкі, выкладанкі і іншыя. Выданне дапоўнена слоўнікам народнай тэрміналогіі ў гэтай галіне, а таксама яркімі, прыгожымі ілюстрацыямі. На прэзентацыі ў філіяле Веткаўскага музея ўсе жадаючыя мелі магчымасць набыць кнігу.