Адбыўся рэгіянальны фінал конкурсу юных чытальнікаў
У Гомелі прайшоў рэгіянальны фінал рэспубліканскага конкурсу юных чытальнікаў «Чытаем па-беларуску з velcom». Мерапрыемства прымала сярэдняя школа № 11.
На працягу двух з паловай месяцаў удзельнікі конкурсу запісвалі відэа, на якіх чытаюць творы па беларускай літаратуры са школьнай праграмы. Хлопчыкі і дзяўчынкі з усёй краіны даслалі на конкурс 2048 ролікаў агульнай працягласцю больш за 45 гадзін. Цікава, што лідэрам сярод рэгіёнаў па колькасці дасланых матэрыялаў стала Гомельшчына – 355 ролікаў. У топе твораў – «Спадчына» Янкі Купалы, «Ручэй» Якуба Коласа, «Раманс» Максіма Багдановіча, «Трэба дома бываць часцей» Рыгора Барадуліна.
Па выніках першага этапа спаборніцтва 30 лепшых удзельнікаў з Гомеля і Гомельскай вобласці сустрэліся ў СШ № 11, каб выканаць адзін з твораў беларускай літаратуры перад журы і гледачамі. Прычым у склад журы ўвайшлі такія знакамітыя асобы, як беларускі пісьменнік Уладзімір Ліпскі, акцёр і тэлевядучы Юрый Жыгамонт і іншыя.
