Кніга Рыгора Андрэяўца пра Ф. Скарыну выйшла з друку
У выдавецтве «Палесдрук» выйшла чарговая кніга Рыгора Андрэяўца «Код Скарыны». Выданне прысвечана 500-годдзю беларускага кнігадрукавання. У сваёй рабоце даследчык ламае стэрэатыпы ў скарыназнаўстве. Так, ён сцвярджае, што першадрукар не быў сакратаром у дацкага караля, не ездзіў у Маскву, а Багдан Онкаў і Якуб Бабіч не былі его мецэнатамі.
А яшчэ Андрэявец запаўняе «белыя плямы» ў біяграфіі Скарыны. Ён адзначае, што Скарына стаў магістрам «вольных навук» у адным з універсітэтаў Германіі, званне доктара атрымаў у Парыжскім універсітэце, а паглыбленыя медыцынскія веды – у знакамітым універсітэце горада Манпелье. Беларускі першадрукар пэўны час працаваў сакратаром у трансільванскага магната, адкуль збег у Падую.
Але самая вялікая загадка Скарыны – гэта яго занятак алхіміяй. Ён быў адэптам Вялікага Вырабу, якому ўдалося здабыць парашок праекцыі. Архіў першадрукара стаў здабыткам імперскага дома Габсбургаў, прадстаўнік якога Рудольф II Габсбург, карыстаючыся паперамі Скарыны, атрымаў чыстае герметычнае золата.
Кніга-гіпотэза «Код Скарыны» чытаецца з цікавасцю. Яна разлічана не толькі на спецыялістаў па гісторыі і культуры, але і на шырокага чытача, неабыякавага да спадчыны роднага краю.
Кажучы аб асобе Рыгора Андрэяўца, варта адзначыць, што пісьменнік з’яўляецца лаўрэатам прэміі Баяна, Усерасійскай прэміі прафесійнага прызнання «Лепшыя пёры Расіі», напісаў больш за дзесяць цікавых кніг на розныя тэмы.